பக்தன் வாக்கை மெய்ப்பிக்க அருள்மழை பொழிந்த கருணைக்கடல் – Rightmantra Prayer Club

நமது பிரார்த்தனை கிளப் பதிவில் எப்போதும் கதை ஒன்றை சொல்லிவிட்டு பிறகு தான் பிரார்த்தனைக்கு தலைமையேற்கும் சிறப்பு விருந்தினரை உங்களுக்கு அறிமுகம் செய்வது வழக்கம். ஆனால் இந்த வாரம் கதையே தேவையில்லை என்னுமளவிற்கு சிறப்பு விருந்தினரின் அறிமுகமும் அவர் வாழ்க்கையில் நடைபெற்ற சம்பவங்களில் ஒன்றுமே பிரமாதமாக அமைந்துவிட்டபடியால் கதையை தனியாக தரவில்லை.

சரி… இந்த வார பிரார்த்தனைக்கு தலைமை தாங்குபவர் யார் தெரியுமா?

திருமதி.ராஜலக்ஷ்மி விட்டல்!

யார் இந்த ராஜலக்ஷ்மி விட்டல்? பிரார்த்தனை கிளபிற்கு தலைமை தாங்கும் அளவிற்கு என்ன செய்துவருகிறார்? மேலே படியுங்கள். இவர் நம் பிரார்த்தனை கிளப்பிற்கு தலைமை தாங்குவது நாம் செய்த பாக்கியம் என்று உங்களுக்கு புரியும்.

திருமதி.ராஜலக்ஷ்மி விட்டல். மஹா பெரியவாளின் பரம பக்தை. அவரே எல்லாம் என்று, நம்மைப் போல் அல்லாமல், மிக வித்யாசமாக, வாழ்ந்து கொண்டிருப்பவர். அப்படியென்ன வித்யாசம்? திருச்சி மாவட்டம் நொச்சியத்தில் (மாதவ பெருமாள் கோவில்) கொள்ளிடக் கரையில் ஒரு சின்ன இடத்தில், வேத பாடசாலை, கோ சாலை நடத்திக் கொண்டு, அதனினும் பெரிய ஆசையாக அம்பாள், கணபதி, சுப்பிரமணியர், தட்சிணாமூர்த்தி, வேத வியாசர், ஆதி சங்கரர், நம் பெரியவாள் உள்ளடக்கிய கோவிலை கட்டி வருகிறார். இதற்கு அடுத்த கட்டமாக நாம் அங்கு போகும் போது தங்குவதற்கு 20 வீடுகளும் கூட. அதுவும், தனக்குப் பின்னால் ஆசிரமம் நல்லபடியாக நடக்க வேண்டும் என்பதற்காக. இவையனைத்தும் முடிந்த பின், அநாதை பிரேத சம்ஸ்காரம், ஞான வாபி, ஸ்ரார்த்த கட்டம் இவற்றை ஏற்படுத்தும் உத்தேசமும் உண்டு. அதற்கு வசதியாக ஆஸ்ரமத்தின் பின் புறத்தில் கொள்ளிடத்தின் வடகரை.

மாமி கட்டிக் கொண்டிருக்கும் அம்பாள் கோவிலில் ஸ்தபதி மற்றும் கட்டிட வேலைகள் மிக துரிதமாக நடந்து கொண்டிருக்கிறது. தை மாதம் லலிதைக்கு பட்டாபிஷேகம் நடத்த உத்தேசித்துள்ளார். பெரியவாளின் பக்தர்கள் ஒவ்வொருவரும் தங்களால் இயன்ற அளவிற்கு இம்மகத்தான தொண்டில் இணைந்து அம்பாளின் அனுக்ரஹத்தை பெற வேண்டும் என்பது மாமியின் ஆசை. முப்பது வருடங்களுக்கு முன் ஃப்ரெண்டிடம் தான் சொன்னது போல், இன்று உலகம் முழுக்க பரவி இருக்கும் பெரியவா பக்தர்களிடம் போனிலும், நேரிலும் பேசுவதிலும் மாமிக்கு அளவு கடந்த சந்தோஷம்.

இதையெல்லாம் செய்து கொண்டு வரும் இவர் வயது என்ன தெரியுமா? எண்பது !

இந்த வயதில் இப்படி ஒரு பெரிய பொறுப்பு ஒன்றை இழுத்துப் போட்டுக்கொண்டு இவர் தனியாளாக செய்துவருவதை பார்த்த இவரது உறவினர் கிருஷ்ணமூர்த்தி என்பவர் இவரை பற்றியும், இவரது பணி பற்றியும் இவரை சந்தித்து பேட்டி எடுத்து அதை தனது முகநூலில் தொடர் போல வெளியிட, மஹா பெரியவா பக்தர்களுக்கு மத்தியில் அதற்கு ஏகோபித்த வரவேற்பு. அதை பால் ஹனுமான் தனது தளத்தில் பகிர்ந்திருந்தார். அங்கு நாம் தொடரை படித்த போது ராஜலக்ஷ்மி மாமியை ஏன் நமது பிரார்த்தனை கிளப்பிற்கு தலைமையேற்க அழைக்கக்கூடாது என்று கருதி அவர்களை தொடர்பு கொண்டு, நம்மை அறிமுகப்படுத்திக்கொண்டு பேசினேன்.

நமது தளத்தின் நோக்கம் மற்றும் பணிகளை பற்றி கேள்விப்பட்டு மிகவும் சந்தோஷப்பட்டார்கள். ஆனால் பிரார்த்தனைக்கு தலைமையேற்க தயங்கினார். “பிரார்த்தனைக்கு தலைமையேற்கும் அளவிற்கெல்லாம் நான் ஒன்றும் அத்தனை பெரிய மனுஷி கிடையாது… எல்லாம் மஹா பெரியவா தான்” என்றார்.

எனக்கு என்ன சொல்வதென்று தெரியவில்லை. “எங்கள் பிரார்த்தனை கிளப்பிற்கு ஒவ்வொரு வாரமும் தலைமை தாங்குவதே மஹா பெரியவா தான். எங்கள் பிரார்த்தனைகள் இறைவனிடம் கொண்டு போய் சேர்த்து பலன் பெற்று தரவேண்டிய மிகப் பெரிய பொறுப்பை அவரிடம் தான் ஒப்படைத்திருக்கிறோம். நீங்கள் இந்த வார பிரதிநிதி. அவ்வளவு தான். மறுக்காமல் எங்கள் அழைப்பை ஏற்று எங்களை காப்பாற்றவேண்டும். எத்தனையோ இன்னல்களுக்கு இடையே இந்த பிரார்த்தனை தான் எங்களை வாழவைத்துக்கொண்டிருக்கிறது அம்மா” என்றோம்.

கடைசியில் மனமிரங்கி “சரி” என்றார்.

இராமாயண பாராயணம் சம்பந்தமாக திருமதி.ராஜலக்ஷ்மி கூறிய ஒரு சிலிர்ப்பூட்டும் சம்பவம் ஒன்றையும் அவர் நமக்கு கூறும் அறிவுரையையும் அவரது வார்த்தைகளிலேயே பார்ப்போம். ஒரு வரிகூட விடவேண்டாம். அத்தனையும் முத்துக்கள்.

இயக்குவது அவரல்லவா?

“அதி மஹா ருத்ரம் நடத்தி (1988) மூணு மாசத்துல கடன் எல்லாம் அடஞ்சுடுத்துன்னு மாமா சொன்னார். எனக்கு ஒரே ஆச்சர்யம். நான் பண்ணின பிசினஸ்ல நிச்சயமா அம்பத்தி ரெண்டாயிரம் ரூவா அத்தன சீக்கரத்துல லாபமா வந்திருக்காது. அப்பிடின்னா, பெரியவா தான் ராமன் தன்னோட தாசனுக்காக கடனை தீர்த்த மாதிரி ஏதோ பண்ணிருக்கான்னு புரிஞ்சுண்டேன். அதுக்கப்றம் எனக்கெதுக்கு பிசினஸ்? மிச்சம் இருந்ததையெல்லாம் என் ஃப்ரெண்ட் கிட்ட கொடுத்தேன். ஒரு லட்சம் கெடச்சுது. நான், என் மனசுக்குள்ள பெரியவாட்ட சொன்னேன் – பெரியவா, நீங்க ஏழை சந்நியாசி கிழவன்னு சொன்னேளே, இப்போ நீங்க லட்சாதிபதின்னு. அந்த பணத்தை என் பிள்ளையும், மாமாவுமா பல விதத்துல இன்வெஸ்ட் பண்ணி பெருக்கினா. அப்புறம் நானும் கொஞ்சம் கொஞ்சமா பணம் சேர்த்தேன். எல்லாமா போட்டுத்தான் இந்த இடத்தை வாங்கினேன். மாமா கூட கேட்டா ‘இந்த வயசுல யானை வாங்கலாமா’ன்னு. நான் சொன்னேன் ‘எல்லாம் பெரியவா பாத்துப்பா’ன்னு. நான் இங்க வந்து பாத்தப்போ அவ்ளோ லக்ஷ்மிகரமா இருந்தது. தென்னை, வாழை, பசு மாடு, கன்னுக்குட்டி, சாணம், பின்னாடியே கொள்ளிடம்….எனக்கு ரொம்ப பிடிச்சுடுத்து. இங்க லலிதைக்கு கோவில் வரப்போறதுன்னு நெனைக்கும் போது சந்தோஷமா இருக்கு. ஆனா, முதல்ல எனக்கு ஆஸ்ரமம், பாடசாலை மட்டும் தான் மனசுல இருந்தது. அதுக்கு ஒரு ஸ்கெட்ச் போடச் சொல்லி பெங்களூருல அபர்ணாங்கற பொண்ணு கிட்ட சொன்னேன். அவ ஆர்க்கிடெக்சர் படிச்சுருந்தா. ஒரு காலேண்டர்ல ஆஸ்ரமம், சுத்திவர காடு, மான், முயல்கள் எல்லாம் படமா போட்டு இருந்தது. அதையும் அவகிட்ட கொடுத்தேன். அவ என்ன போட்டு கொண்டு வந்து கொடுத்தா தெரியுமா? அம்பாளோட ஸ்ரீ சக்ரம் ! இப்போ சொல்லுங்கோ, இதெல்லாம் யாரு பண்றா? நானா? எல்லாமே பெரியவாதான். அவர்தான் எல்லாத்தையும் பாத்துப் பாத்துப் பண்றார்.

நீங்களே சொல்லுங்கோ, யாராவது இந்த மாமிக்காக ஏதாவது பண்ணுவாளா? எல்லாரும் யாருக்காக பண்றா? பெரியவாளுக்காக. அவர்தான் சூட்ஷுமமா இருந்து இத்தனை கார்யங்களையும் கவனிச்சு நடத்திண்டு இருக்கார். இது ஒரு பெரிய அதிசயம் இல்லையா? எத்தனையோ இக்கட்டான சூழ்நிலையெல்லாம் வரது. ஆனா, ஒவ்வொரு தடவையும் பெரியவா தன்னோட பக்தாள்ல யாரையாவது அனுப்ச்சு வேண்டியதை செய்ய வச்சுடறா. அவா எல்லாம் எங்கிட்ட என்ன சொல்றா தெரியுமா? மாமி, நீங்க கவலை படாதீங்கோ. நாங்க பாத்துக்கறோம்னு.

ராமாயணத்துல கிஷ்கிந்தா காண்டத்துலதான் ஹனுமார் ராமர்ட்ட அடைக்கலமாறார். அதுமாதிரி நானும் கிட்டத்தட்ட என்னோட முப்பதாவது ப்ராயத்துல தான் பெரியவாட்ட சரணடைஞ்சேன். ஆனா, அவரைப்போல வல்லமை எல்லாம் எனக்கு கெடயாது. இப்போ, நீங்களெல்லாம் அந்த வாயு புத்ரனோட சேர்ந்தவா எல்லாரும் ராம சேனைல சேர்ந்துண்ட மாதிரி பெரியவாட்ட சரணாகதி ஆயுட்டேள். எனக்கு இப்போ உங்களைப் போல கோடிக் கணக்கான குழந்தைகள். பெரியவா குடும்பம் பெரிசாய்டுத்து. அவாளுக்கு உங்களை எல்லாம் காப்பாத்தற பொறுப்பு வந்துடுத்து (இதை சொல்லும் போது சிரிக்கிறார்). நீங்களெல்லாம் தான் எனக்கு கெடச்ச பெரிய நிதி. நீங்க எல்லாரும் பரம க்ஷேமமா இருப்பேள்.

மழை பெய்யவேண்டி பெரியவா சொன்ன படி இராமாயண பாராயணம் – ஆனால் மழை பொழிந்ததா?

1968,69 – ல திருச்சில இருந்தேன். மழையே இல்லை. சகல ஜீவ ராசிகளும் தண்ணிக்கு தவிச்சுது. ஜனங்களுக்கு லாரில தான் தண்ணி வரும். நம்ம குளிக்கறதே அதிர்ஷ்டம். மாடுகளை குளிப்பாட்ட முடியாது. என்னோட தேவைகளுக்கு கிணத்துலேர்ந்து இறச்சுப்பேன். எங்கயோ ஆழத்துல தண்ணி இருக்கும். பயிர்கள் எல்லாம் அழிஞ்சுது. எங்க பாத்தாலும் வறட்சி. கஷ்டம். நாட்டு நடப்பு நன்னா இல்லை. மக்கள் ரொம்ப அவதிப்பட்டா.

அயோத்தியும் அப்படித்தான் இருந்தது. அதனாலதான் பரதனை சீக்கரமா அழைச்சுண்டு வரணும்னு சொன்னா. இதெல்லாம் யோசிச்சப்ப தான் இராமாயண பிரவசனம் வெச்சுக்கலாம்னு என்னோட குருவுக்கு கார்டு எழுதினேன். பண்ணுன்னு அவர் அனுக்ரஹம் செஞ்சார். அவர் சொன்னதன் பேர்ல அவரோட நேர் சம்பந்தி அரியூர் சுப்பிரமணிய கனபாடிகள் (ஹனுமான் காட், காசி) எங்க அகத்துலையே தங்கி பத்து நாளைக்கு இராமாயண பிரவசனம் பண்ண சம்மதிச்சார். அப்போ, என் அம்மா வந்திருந்தா. அவர், என்னோட அம்மா கிட்ட ‘இந்த பொண்ணை எப்படி பத்து மாசம் வயத்துல வச்சுண்டு இருந்தே, ஒரு நிமிஷம் சும்மா இருக்க மாட்டேங்கறாளே ன்னு சொல்லுவார். மாமா, குழந்தைகள், வீடு, வாசல், மாடுன்னு இருந்துடுவேன். டைம் கெடச்சா ராமாயணம் படிக்க ஒக்காந்துடுவேன். அதையெல்லாம் என் பிள்ளை கிட்ட சொல்லுவேன். பின்னாடி ஆத்துல என்னைவிட வயசான மாமி இருந்தா. ‘என்ன லக்ஷ்மி உன்னை ரெண்டு நாளா பாக்கவே முடியலை’ன்னு கேப்பா. நான் படிச்சத மாமிட்ட சொல்லுவேன். மாமியும் எனக்கு நெறைய சொல்லுவா. எனக்கு இந்த நகை, நட்டு, சினிமா, வம்பு எதுலயும் ஈடுபாடு கெடயாது. எப்பவும் பகவன் நாமாவ ஸ்மரிச்சுண்டு இருப்பேன். ராமாயணத்துல என்னை அப்பிடியே பிழிஞ்ச எடம் ஒண்ணு இருக்கு, அத அப்புறம் சொல்றேன்.

ப்ரவச்சனத்தோட ஒம்பதாவது நாள் வரைக்கும் மழை இல்லை. அப்போ கனபாடிகள் பகவானை பிரார்த்தனை பண்ணிண்டு, நான் இந்த ஊரை விட்டு கெளம்பறதுக்கு முன்னாடி மழை பெய்யலேன்னா, என்னோட வாக்கு பொய், ராமாயணம் பொய், பக்தியும் பொய்ன்னு ஆய்டும். அதுக்கப்றம் நான் இராமாயண பிரவசனம் பண்றத விட்டுடுவேன்னு சத்ய பிரமாணம் எடுத்துண்டார். ஆச்சு, அவர் கெளம்பற நேரமும் வந்துது. எல்லாருக்குமே மனசு பாரமா இருந்தது. அப்போ, மேகம் கருக்க ஆரம்பிச்சுது. சில நிமிஷத்துல இருட்டாய்டுத்து. கொஞ்சமா ஆரம்பிச்ச மழை கொட்டோ கொட்டுன்னு கொட்டி தீத்துது. ராமன், தானும் பொய் இல்லை, தன்னை நம்பின பக்தனும் பொய் இல்லைன்னு நிரூபிச்சான். நான் சுவாமி முன்னாடி உக்காந்துண்டு கதறினேன். (எழுத்துரு உதவி : balhanuman.wordpress.com)

ராஜலக்ஷ்மி மாமி நமக்கு விடுக்கும் செய்தி என்ன?

அன்னிக்கு மட்டும் இல்லை, இன்னைக்கும் அதுதான் சத்யம். நாடு சுபிக்ஷமா இருக்கணும்னா தர்மம் தழைக்கணும். தர்மத்தை நாம ரக்ஷிக்கணும். நமக்கு நல்ல மனசு, புத்தி, சிந்தனை, வாக்கு, கார்யம் இருக்கணும்னு பகவானை ப்ரார்த்திக்கணும். எல்லார் கிட்டையும் அன்பு செலுத்தணும். ஞானம் வேணும்னு பகவான் கிட்ட கேக்கணும். அடக்கத்தோட இருக்கணும். அஹங்காரம், கோபம், துவேஷம், ஆசை, துரோகம், வக்ரம், பொய், பொறாமை, வேஷம் எல்லாத்தையும் விட்டுடணும். அப்போ பகவான் நம்மை நிச்சயமா ரக்ஷிப்பார். கை விட மாட்டார். தர்மத்தை காப்பாத்துங்கோ, அது உங்களை காப்பாத்தும். ஷேமமா இருங்கோ.

நாம எப்பவுமே சித்த சுத்தி பண்ணிண்டே இருக்கணும். எல்லாருக்கும் எப்பவும் நல்லதுதான் செய்யணும். நம்மால யாருக்கும் ஒரு கஷ்டமும் வரக்கூடாது. அப்படித்தான் நம்ம கர்ம பலனை கொறச்சுக்க முடியும். பகவானும் ஓடோடி வந்து நம்மை ரட்சிப்பார்.

(ராஜலக்ஷ்மி மாமியை இறைவன் அருளால் அடுத்த மாதம் முதல் அல்லது இரண்டாம் வாரம் நொச்சியம் சென்று நேரில் சந்தித்து அளவளாவி ஆசி பெற்றுவிட்டு வர உத்தேசித்துள்ளேன். அதன் பின்னர் அவர் கட்டி வரும் லலிதாம்பிகை கோவிலுக்கு நம் தளம் சார்பாக நிதி திரட்டி அவரிடம் அளிக்கப்படும்!).

========================================================

இந்த வார பிரார்த்தனைக்கான கோரிக்கைகளை பார்ப்போமா?

முதல் கோரிக்கை முற்றிலும் நெகிழ வைக்கும் ஒன்று என்றால் மிகையாகாது. தனது ஆருயிர் நண்பர்கள் படும் துயரத்தை கண்டு பொறுக்கமுடியாமல் அவர்களுக்கு நம்மால் இயன்ற எதையேனும் செய்தே தீரவேண்டும் என்று துடிப்பு ஒரு பெண்ணுக்கு ஏற்பட்டு, செய்வதறியாது கலங்கி, இறுதியில் இந்த கூட்டு பிரார்த்தனையாவது அவர்களுக்காக நாம் செய்வோம் என்று கருதி அதற்கு இங்கு மனு செய்திருக்கிறார். இதற்காக அவர் மெனக்கெட்டு பிரவுசிங் செண்டர் சென்று அங்கு இதை தட்டச்சு செய்து அனுப்பியிருக்கிறார் என்று கருதுகிறேன். நண்பர்கள் பால் அவர் வைத்திருக்கும் உண்மையான அன்பிற்கும் அக்கறைக்கும் ஒரு ராயல் சல்யூட்.

அடுத்து நண்பர் விஜய். இவர் நம் RIGHTMANTRA துவங்கியதில் இருந்தே நம் நண்பர். நம் பணிகளில் வெளியே தெரியாமல் உடனிருப்பவர். சமீபத்தில் நம் ஆண்டுவிழாவிற்கு கூட மனைவியுடன் வந்திருந்தார். அடுத்த சில நாட்களில் அவர் மனைவி கீழே கூறிய விபத்தில் சிக்கியதாக தெரிகிறது. தலைக்கு வந்தது தலைப்பாகையோடு போனது போல சான்றோர்களை தரிசித்ததால் மிகப் பெரிய ஆபத்து ஒன்று தவிர்க்கப்பட்டு இத்தோடு போனது என்று நான் கருதுகிறேன்.

==========================================================

நண்பர்கள் நலம் பெறவேண்டும்

என் பெயர் தீபா. நான் உங்கள் இணையதளத்தின் மூலம் பல தகவல்களையும் படித்தேன். இதில் பயன் பெறும் வகையில் அனைத்து தகவல்களும் உள்ளன. இதில் ஆன்மீக தகவல்களும், பிரார்த்தனை நிறைவேறிய கதை தகவல்களும், உங்கள் RIGHTMANTRA.COM தளம் வளர்ந்த கதையையும் படித்தேன். இதன் மூலம் பலர் ஆத்ம திருப்தியும் பயனும் பெற்றுள்ளார்கள் என்பதையும் அறிந்தேன். அதேபோல் உங்களுடைய பிரார்த்தனை கிளப்பில் என்னுடைய பிரார்த்தனையும் நிறைவேற பிரார்த்தியுங்கள்.

என்னுடைய பிரார்த்தனை என்னுடைய நெருங்கிய நண்பர்கள் மூன்று பேர்களுக்காக.

முதல் நபர் கணேஷ் கண்ணா ஆவார். அவர் பெரும் கடன் பிரச்னையில் உள்ளார். அவருடைய கடன் பிரச்னை தீரவும், அவரும் அவர் குடும்பத்தினரும் நலமுடன் வாழவும் பிரார்த்திக்க வேண்டுகிறேன்.

இரண்டாவது நபர் உமாதேவி ஆவார். அவர் உடல்நிலை மிகவும் பாதிக்கப்பட்டுள்ளார். அவருக்கு புற்றுநோய் உள்ளது. அதற்காக விரைவில் அறுவை சிகிச்சை செய்யவுள்ளார்கள். அறுவை சிகிச்சைக்கு பிறகு அவர் நலமுடனும் அவர் குடுமப்தினர் நலமுடனும் இருக்க பிரார்த்தியுங்கள்.

மூன்றாவது நபர் உமாராணி ஆவார். அவர் குடும்பப் பிரச்சனையால் மிகவும் பாதிக்கப்பட்டுள்ளார். சொந்த மகனால் தான் அவருக்கு இந்த பிரச்னை ஏற்பட்டுள்ளது. இதனால் அவர் உடல் நிலை சரியில்லாமலும் மனநிம்மதியில்லாமலும் இருக்கிறார். அவருடைய மகன் திருந்தவும் அவர் இனி நிம்மதியாகவும் சந்தோஷமாகவும் இருக்கவும் பிரார்த்தியுங்கள்.

மேற்கூறிய இந்த மூவரின் நலனுக்காக பிரார்த்திக்கும்படி உங்களை கேட்டுக்கொள்கிறேன். இதில் பிழை ஏதேனும் இருந்தால் மன்னியுங்கள்.

நன்றி
தீபா

==========================================================

எலும்பு முறிவால் பாதிக்கப்பட்டுள்ள வாழ்க்கைத் துணை நலம் பெறவேண்டும்

என் பெயர் விஜய். சுந்தர் அவர்களின் நண்பன். இந்த தளத்தின் தீவிர வாசகர்.

என் மனைவி பவித்ரா (27) உறவினர் வீட்டுக்கு செல்லும்போது அங்கு படி இடறி கீழே விழுந்துவிட்டார். கையில் வைத்திருந்த உறவினரின் குழந்தைக்கு அடிபடாமல் காப்பாற்றவேண்டி இவர் ஏடாகூடமாக விழுந்துவிட்டார். அதில் எலும்பு முறிவு ஏற்பட்டு தற்போது மருத்துவமனையில் அனுமதிக்கப்பட்டு சிகிச்சை பெற்று வருகிறார். கடந்த ஒரு வாரமாக அலுவலகம் செல்ல முடியாது அவதிப்பட்டு வருகிறேன். அவர் விரைவில் பரிபூரண குணம் பெற்று வீடு திரும்ப உங்கள் அனைவரையும் பிரார்த்திக்கும்படி வேண்டிக்கொள்கிறேன்.

– விஜய் SJEC

==========================================================

நமது பொது பிரார்த்தனை :

புயல் புரட்டிப்போட்ட ஓடிஷாவில் இயல்பு நிலை திரும்ப வேண்டும்

ஓடிஷாவில் சமீபத்தில் பைலின் புயல் தாக்கி மிகப் பெரும் சேதத்தை ஏற்படுத்திவிட்டு சென்றுள்ளது. அம்மாநில மக்களின் இயல்பு வாழ்க்கை மிகவும் பாதிக்கப்பட்டுள்ளது. வசிக்க வீடின்றி, உண்ண உணவின்றி லட்சக்கணக்கான மக்கள் பாதிக்கப்பட்டுள்ளனர். புயல் ஏற்படுத்திய பாதிப்பு விரைவில் நீங்கி, அம்மக்களின் இயல்பு வாழ்க்கை விரைவில் திரும்பவும், அவர்கள் சந்தோஷமாக இனி வரும் நாட்களை எதிர்கொள்ளவும் இறைவனை பிரார்த்திப்போம்.

எதிர்காலத்தில் கோவில் திருவிழாக்களில் எந்த வித அசம்பாவிதமும் நிகழக்கூடாது

அதே போல, ம.பி.யில் நவராத்திரியை முன்னிட்டு வைஷ்ணவி தேவி கோவில் திருவிழாவில் வதந்தி கிளப்பிவிடப்பட்டதையடுத்து நெரிசல் ஏற்பட்டு அதில் 115 பக்தர்கள் இறந்துள்ளனர். அவர்கள் அனைவரின் ஆன்மா சாந்தியடையவும், கோவில் மற்றும் இதர ஆலயம் எதிர்காலத்தில் இப்படியொரு அசம்பாவிதம் ஏற்படக்கூடாது என இறைவனை பிரார்த்திப்போம். (இது போன்று கோவில், மற்றும் புண்ணிய யாத்திரைகளுக்கு செல்லும்போது விபத்தில் சிக்கி இறக்க நேரிட்டால் அவர்கள் மறுபிறவி என்பதே இன்றி நேரடியாக முக்தி பெறுவார்கள் என்று சிறு வயதில் கேள்விப்பட்டிருக்கிறேன்!)

==========================================================

வாசகி தீபா அவர்களின் நண்பர்கள் கணேஷ் கண்ணா, உமாதேவி, உமா ராணி ஆகியோருக்கு ஏற்பட்டுள்ள பிரச்னைகள் தீர்ந்து அவர்கள் நிம்மதியுடனும் சந்தோஷத்துடனும் வாழவும், எலும்பு முறிவால் பாதிக்கப்பட்டு சிகிச்சை பெற்று வரும் நண்பர் விஜய் அவர்களின் மனைவி பவித்ரா அவர்கள் விரைவில் நலம் பெற்று வீடு திரும்பவும், ஓடிஷாவில் புயல் ஏற்படுத்தியுள்ள பாதிப்பு முழுமையாக நீங்கி அங்கு இயல்பு வாழ்க்கை விரைவில் திரும்பவும், கோவில் திருவிழாக்களில் எதிர்காலத்தில் அசம்பாவிதங்கள் எதுவும் நிகழாமல் இருக்கவும் பிரார்த்திப்போம்.