உங்கள் உலகம் பெரிதாகி துன்பங்கள் கடுகாக வேண்டுமா?

ஒரு முறை சரக்கு கப்பல் ஒன்று விபத்துக்குள்ளாகிவிடுகிறது. கப்பலில் பணியில் இருந்த இரண்டு ஊழியர்கள் மட்டும் தப்பிவிடுகின்றனர். நீச்சலடித்து அருகில் இருந்த மனிதர்கள் சஞ்சாரம் இல்லாத தீவில் இருவரும் கரை சேர்கின்றனர்.

கடவுளிடம் பிரார்த்தனை செய்வதை தவிர அவர்களுக்கு வேறு வழி தெரியவில்லை. யாருடைய பிரார்த்தனை வலிமையானது என்று பார்ப்பதற்காக அந்த தீவை இரு பகுதிகளாக பிரித்து ஒரு பகுதியின் ஓரத்தில் ஒருவனும் மற்றொரு பகுதியின் ஓரத்தில் இன்னொருவனும் இருப்பது என்று முடிவானது.

அடுத்த நாள் முதலாமவன் செய்த முதல் பிரார்த்தனை என்ன தெரியுமா? சாப்பிட ஏதாவது உணவு வேண்டும் என்பது தான்.

என்ன அதிசயம் அடுத்த நாள் காலை இவன் இருந்த பகுதியில் பழங்கள் காய்த்து தொங்கும் மரம் ஒன்று காணப்பட்டது. தீவின் மற்றொரு பகுதி வெறிச்சோடி இருந்தது.

ஒரு வாரம் சென்ற பிறகு, தனிமை அவனை கொல்லவே, “எனக்கொரு ஒரு அழகான பெண் மனைவியாக வரவேண்டும்” என்று பிரார்தித்துக்கொண்டான். அடுத்த நாள் மொற்றொரு கப்பல் விபத்துக்குள்ளாகி அதிலிருந்து தப்பித்த ஒரு பெண் இவன் இருந்த தீவில் கரை ஒதுங்குகிறாள். மற்றொருவன் இருக்கும் தீவின் அடுத்த பகுதி வெறிச்சோடியே காணப்பட்டது.

இவன் அடுத்து வீடு, உடைகள், என அனைத்தையும் கேட்க, என்ன அதிசயம் ஒவ்வொன்றாக இவன் பகுதியில் தோன்றியது.

தனது பிரார்த்தனையின் வலிமையை உணர்ந்துகொண்ட இவன், கடைசீயாக ஒரு கப்பல் வந்து எங்களை அழைத்துச் செல்லவேண்டும் என்று வேண்டிக்கொண்டான்.

என்ன அதிசயம், ஒரு கப்பல் இவன் இருந்த தீவின் அருகே நங்கூரம் இட்டு நின்றுகொண்டிருந்தது.

கப்பலில் மனைவியுடன் ஏறிக்கொண்டவன் தீவில் மற்றொரு பாதியில் இருந்த இவன் நண்பனை மறந்தேவிட்டான்.

திடீரென வானில் இருந்து அசரீரி கேட்டது.

“ஏன் உன் நண்பனை விட்டுவிட்டு செல்கிறாய்?”

“எனக்கு கிடைத்தவை கடவுள் எனக்கென்றே என் பிரார்த்தனைக்காக கொடுத்தது. அவன் பிரார்த்தனைகளை கடவுள் ஏறெடுத்தும் பார்க்கவில்லை. எனவே அவன் இத்தகு உதவிகளுக்கு தகுதியற்றவன்.”

“நீ கூறுவது தவறு! அவன் ஒரே ஒரு கோரிக்கையை தான் என்னிடம் வைத்தான். அதை நான் ஏற்றுக்கொண்டேன். இல்லையேல் உனக்கு ஒன்றும் கிடைத்திருக்காது!” அசரீரி சொன்னது.

“அவனுக்கு நான் கடன்படும் அளவிற்கு அவன் அப்படி என்ன கேட்டுவிட்டான்?”

“உனது பிரார்த்தனைகளை நான் ஏற்றுக்கொள்ளவேண்டும் என்று தான் அவன் பிரார்த்தித்தான்!” என்கிறார் அசரீரியின் வடிவில் இருந்த கடவுள்.

தனது சுயநலத்தை நினைத்தும் செயலை நினைத்தும் வெட்கப்பட்டான் இவன்.

நமக்கு கிடைத்துள்ள முன்னேற்றம் மற்றும் ஆசிகள் நம் பிரார்த்தனையால் மட்டுமே கிடைத்தவை அல்ல. நமக்காக பிரார்த்திக்கும் மற்றவர்களினால் தான் என்பதை ஒரு போதும் மறவாதீர்கள்.

இன்று என்னை சுற்றிலும் இறையருள் பரிபூரணமாக விரவியிருப்பதை காண்கிறேன். ஒவ்வொரு கணமும் அனுபவிக்கிறேன். உணர்கிறேன். இதற்கு காரணம் என்ன தெரியுமா? என் மீதும் கொண்ட அன்பு கொண்டு எனது நலனை வேண்டி பிரார்த்திக்கும் உங்களை போன்ற அன்பு உள்ளங்கள் தான். நிச்சயம் நானல்ல. ஏனெனில் எனக்காக நான் பிரார்த்தித்து வந்தவரை இறைவன் என்னை கண்டுகொண்டதேயில்லை.

எப்போது மற்றவர்களின் நலன் குறித்து நான் நினைக்க ஆரம்பித்தேனோ அப்போதோ என்னுடைய உலகம் பெரிதாகிவிட்டது. என்னுடைய துன்பம் கடுகாகிவிட்டது.

உங்களுக்காக நீங்கள் வேண்டும் போது எந்தளவு மனமுருகி பிரார்த்திக்கிறீர்களோ அதே அளவு மற்றவர்களுக்காகவும் உங்கள் மனம் உருகவேண்டும். அத்தகையோரை இறைவன் மிகவும் விரும்புவான்.

எனவே மற்றவர்களுக்காக பிரார்த்திப்போம்.

பிறர் நலனுக்காக நாம் செய்யும் கூட்டுப் பிரார்த்தனையின் ஒவ்வொரு கணமும் மகத்துவம் மிக்கது.

============================================

இந்த வாரம் கூட்டுப் பிரார்த்தனைக்கு தலைமை ஏற்பவர் யார் தெரியுமா? 

மகா பெரியவா அவர்களின் மகிமைகளை, பக்தர்கள் வாழ்வில் அவர் நிகழ்த்தி வரும் அற்புதங்களை அனுதினமும் பல்வேறு இடங்களுக்கு சென்று சொற்பொழிவு செய்து வரும் திரு. பி.சுவாமிநாதன்.

இவரின்  ‘மகா பெரியவா மகிமைகள்’ சொற்பொழிவு நிகழ்ச்சி நம் தளம் சார்பாக பிப்ரவரி மாதம் நடத்தப்பட்டது நினைவிருக்கலாம். நம் வாசகர்கள் பெருந்திரளாக திரண்டு வந்த இனிமையான நிகழ்வு அது.

திரு. பி.சுவாமிநாதன் பழகுதற்கு இனிய பண்பாளர். நல்லவர். பிறர்நலன் விழையும் ஒரு அன்பு உள்ளம். சக்தி விகடன், திரிசக்தி உள்ளிட்ட ஆன்மீக இதழ்களில் பொறுப்பாசிரியராக பணியாற்றி தற்போது மகா பெரியவா அவர்களை பற்றி சொற்பொழிவு செய்வதை பிரதானமாக கொண்டு செயல்பட்டுவருகிறார். பல ஆன்மீக நூல்களை எழுதியிருக்கிறார். எழுதி வருகிறார்.

(இவர் கலந்துகொண்டு சொற்பொழிவு நிகழ்த்தும் நிகழ்ச்சி பற்றிய விபரங்கள் நம் தளத்தில் இனி ரெகுலராக இடம்பெறும். அந்தந்த பகுதிகளில் இருக்கும் வாசகர்கள் நேரில் சென்று குருவின் பெருமையை கேட்டு இருவினையை தீர்த்துக்கொள்ளவேண்டும் என்று கேட்டுக்கொள்கிறேன்.)

நமது தளத்தின் பிரார்த்தனை கிளபிற்கு இந்த வாரம் தலைமையேற்க வேண்டும் என்று சொன்னவுடன் நம் வாசகர்களுக்காக நிச்சயம் இதை செய்வதாக கூறி ஒப்புக்கொண்டார்.

நமது ஒவ்வொரு பிரார்த்தனையும் மகா பெரியவாவின் திருவடிகளிலேயே சமர்ப்பிக்கப்பட்டு வரும் நிலையில், அவரின் பெருமையையே அனுதினமும் பேசும் அவரது உண்மைத் தொண்டர் ஒருவர் நமது பிரார்த்தனைக்கு தலைமையேற்றிருப்பது நமது தளத்திற்கு குருவருள் பரிபூரணமாக உண்டு என்பதையே காட்டுகிறது.

திரு.சுவாமிநாதன் அவர்கள் கலந்துகொண்ட நமது தளத்தின் சார்பாக ஏற்பாடு செய்யப்பட்ட ‘மகா பெரியவா மகிமைகள்’ நிகழ்ச்சி குறித்த பதிவுக்கு…

மகா பெரியவா நிகழ்ச்சிக்கு வந்தவர்களுக்கு நாம் அளித்த திக்குமுக்காட வைத்த பரிசு!

============================================

சென்ற வாரம் சிங்கப்பூரிலிருந்து நமது தள வாசகி அனுராதா என்பவர் நம்மை தொடர்பு கொண்டார். நமது தளத்தையும் நமது பணிகளையும் பாராட்டியவர் எத்தனையோ துன்பங்களுக்கிடையே நமது தளம் தான் அவருக்கு ஆறுதலாக விளங்குவதாக கூறினார். மேலும் சுந்தரகாண்டம் நூலை தமக்கு அனுப்பும்படியும் கேட்டுக்கொண்டார். அவரை பற்றி விசாரித்தபோது திருமண வாழ்வில் ஏற்பட்ட கசப்பு காரணமாக கணவன், மனைவி, குழந்தை என மூவரும் ஆளுக்கொரு திக்காக பிரிந்துவிட்டதாகவும் தாம் உயிரே வைத்திருக்கும் தமது மூன்று வயது மகளை பார்க்க கூட முடியாது தவிப்பதாகவும் கூறினார். அவரிடம் பேசியதிலிருந்து, இப்படிப்பட்ட ஒரு நல்லுள்ளத்திற்கு ஏன் இந்த சோதனை என்று தான் நம் மனம் வேதனைப்பட்டது. பக்குவமும், அன்பும், கருணையும், பாசமும் மிக்க அவருக்கு பிரச்னைகள் தீர்ந்து குழந்தையுடன் அவர்  சேரவேண்டும். இனியதொரு எதிர்காலம் அவருக்கு அமையவேண்டும்.

நமது பிரார்த்தனை கிளப்பிற்கு மனு செய்யும்படி கேட்டுக்கொண்டேன். இதையடுத்து தனது குழந்தையின் ஏக்கமாக நமக்கு மின்னஞ்சலில் பிரார்த்தனை கோரிக்கையை அனுப்பியிருக்கிறார்.

அடுத்து, மயிலையில் உள்ள திருவள்ளுவர் கோவில் குருக்கள். பழகுதற்கு மிகவும் இனிமையான நபர் இவர். நம் தளத்தின் ரெகுலர் வாசகர்.

நமது நிகழ்சிகளுக்கு பதட்டத்தில் நான் அழைக்க மறந்தால் கூட அதை பெரிதுபடுத்தாமல் தவறாமல் ஆஜராகி, ஒரு ஓரமாக அமர்ந்து ரசித்துவிட்டு செல்லும் பண்பாளர் இவர். அந்த வகையில் இவர் சமீபத்தில் நாம் ஒரு நிகழ்ச்சியில் கலந்துகொண்டு உரையாற்றிய போது வந்திருந்து நம்மை கௌரவித்தார்.

இவரைப் பற்றி நான் நிறைய எழுத வேண்டும். விரைவில் தனிப்பதிவாக எழுதுகிறேன். அதில் மற்றவர்கள் கற்றுகொள்ளவேண்டியது நிறைய இருக்கிறது.

சில நாட்களுக்கு முன்பு எதேச்சையாக இவரை தொடர்புகொண்டபோது தான் எனக்கு தெரிந்தது ஹார்ட் அட்டாக் வந்து இவர் மருத்துவமனையில் அனுமதிக்கப்பட்டிருந்த விஷயம். அவரது துணைவியார் விஷயத்தை என்னிடம் சொன்னதும் பதறிப்போனேன்.

நேற்று இரவு பணி முடிந்ததும் மயிலை கல்யாணி மருத்துவமனைக்கு நேரில் சென்று ஆறுமுகம் மற்றும் அவரது குடும்பத்தினரை நேரில் சந்தித்து ஆறுதல் கூறி அவர்களுக்கு தேவையான உதவிகளை செய்வதாக கூறியிருக்கிறேன். ஐ.சி.யூ.வில் இருந்து தற்போது   நார்மல் வார்டுக்கு மாற்றப்பட்டிருக்கிறார்.

மருத்துவமனை செலவுகளுக்கு கடன் வாங்கவேண்டிய நிர்பந்தத்தில் அக்குடும்பம்  இருக்கிறது. இவருக்கு உதவவேண்டியது நமது கடமை. நண்பர்களுடன் கலந்து பேசி விரைவில் இது தொடர்பாக முடிவு செய்யப்படும். டிஸ்சார்ஜ் ஆனவுடன் அடுத்த வாரம் வீட்டில் வந்து சந்திப்பதாக கூறியிருக்கிறேன்.

திருவள்ளுவர் கோவிலுக்கு நாம் ஆலய தரிசனத்திற்கு சென்று வந்தது பற்றிய பதிவுகளுக்கு:

திருக்குறள் தந்த திருவள்ளுவர் தம்பதி சமேதராக எழுந்தருளியிருக்கும் பழமை வாய்ந்த கோவில்

சங்கரி சங்கர நாராயண விருட்சம் & நவ நாத சித்தர்கள் — திருவள்ளுவர் திருக்கோவில் பாகம் 2

============================================

பிரார்த்தனைக்கான கோரிக்கைகளை பார்ப்போமா?

அம்மா… உன்னை பார்க்கவேண்டும்….உன்னுடன் சேரவேண்டும்!

நல்ல படிப்பு,  தேவையான வருமானம் எல்லா வசதிகளையும் பெற்று, சிங்கப்பூரில் வசிக்கும் என் தாய் தந்தைக்கு மகளாய் பிறந்தும், பெற்றோரை பிரிந்து சென்னையில் வாழும் மூன்று வயது குழந்தை நான்.

என் தந்தை, என் மேல் உரிமை கோரி சிங்கப்பூர் நீதிமன்திறத்தில் வழக்கு தொடர்ந்துள்ளார். பேசி தீர்க்கும்படி என் அம்மா எடுத்த எல்லா முயற்சியும்  தோல்வியில் முடிய, இரண்டு வருட காலமாக வழக்கு  தொடர்வதால்,
என் அம்மாவுடன் சேர முடியாத நிலை தொடர்கிறது.

வழக்கை நடத்த வேண்டி என் அம்மா வேலை துறந்து வரமுடியாமல், என்னை பிரிந்து, என் அம்மா மீளா துயரத்தில் சிங்கப்பூரில் இருக்கிறார். நாங்கள் வழக்கிலிருந்து மீண்டு, நான், என் தாயுடன்  விரைவில் சேர எனக்காக எல்லாரும்  பிரார்த்தனை செய்யுமாறு கேட்டு கொள்கிறேன்.

உங்கள் அன்பிற்குறிய,
தர்ஷ்னா

============================================
வள்ளுவருக்கு தொண்டு செய்பவர் வாழ்வாங்கு வாழவேண்டும்

என்னுடைய நண்பர் நம் தளத்தின் வாசகர் திருவள்ளுவர் கோவிலின் அர்ச்சகர் திரு.ஆறுமுகம் குருக்கள் அவர்கள் மாரடைப்பு காரணமாக சென்னை மயிலையில் உள்ள கல்யாணி மருத்துவமனையில் அனுமதிக்கப்பட்டிருக்கிறார். ஐ.சி.யூ.வில் சிகிச்சை பெற்று வந்த அவர் தற்போது நார்மல் வார்டுக்கு மாற்றப்பட்டிருக்கிறார்.

அவர் பரிபூரண குணமடைந்து விரைவில் வீடு திரும்பவேண்டும். அவருக்கு இல்லறத்தில் பிரதான கடமைகள் பாக்கியிருக்கிறது. மகன் தற்போது தான் தலையெடுத்து பணிக்கு சென்று வருகிறார். மகள் கல்லூரியில் படித்துவருகிறார்.

அவரை நம்பியே அவரது குடும்பம் உள்ளபடியால் அவர் நலம் பெற்று திரும்ப பிரார்த்திப்போம்.

============================================

திருமதி.அனுராதா அவர்கள் தன் குழந்தை தர்ஷ்னாவுடன் சேரவும், போர்க்களமாக திகழும் அவரது வாழ்வில் விரைவில் வசந்தம் வீசவும் ஐயன் வள்ளுவருக்கு கடந்த பல ஆண்டுகளாக தொண்டு செய்து வரும் திருவள்ளுவர் கோவிலின் குருக்கள் திரு.ஆறுமுகம் அவர்கள் விரைவில் நலம்பெற்று வீடு திரும்பவும்,  எதிர்கால கடமைகளை அவர் இனிதே நிறைவேற்ற எல்லா வலிமையையும் அவருக்கு  தரவேண்டியும் இறைவனை பிரார்த்திப்போம்.